(રાગ-ગામમાં પિયર ને ગામમાં સાસરું રે લોલ...)
સાસુ! બેઠાં બેઠાં માળા જપો રે લોલ,
ને લો નિરાંતે પ્રભુજીનું નામજો;
ઘરનાં તે કામ હું કરીશ રે લોલ!
ખાણું રાંધીશ પાણી ભરીશ રે લોલ,
મનની ચિંતા છોડી દો તમામ જો; ઘરનાં...
તમારી ઉંમર થૈ પાકટ રે લોલ,
કામમાંથી લૈ લો હવે આરામ જો; ઘરનાં...
સુખના દા'ડા તમારે આવ્યા રે લોલ,
જાત્રા તમે કરજો ચાર ધામ જો; ઘરનાં...
નથી જીવન કોરો કાગળ રે લોલ,
મનમાં તમારા ચોસઠધામ જો;
એ મનની જાત્રા હું કરીશ રે લોલ!
તમે છો મુજ મનની દેવી રે લોલ,
ભરજો મનમાં સદાયે હામ જો;
પૂજા હું તો તમારી કરીશ રે લોલ!
જ્ઞાનનો ખજાનો તમે સાસુ રે લોલ,
દૂર કરજો અજ્ઞાનની શામ જો;
સેવામાં પ્રભુજી નિહાળીશ રે લોલ!
આજ્ઞા પાળીશ તમારી હોંશે રે લોલ,
વર્તન કદી થાય નૈ બેફામ જો;
ઘ્યાન એવું ખૂબ હું રાખીશ રે લોલ!
પ્રભુમય તમે બની જાવ રે લોલ,
કરું તમને સદાયે પ્રણામ જો;
ઘરનો ભાર હું ઉપાડીશ રે લોલ!
* * *
ટિપ્પણીઓ નથી:
ટિપ્પણી પોસ્ટ કરો