(રાગ-રમતો જોગી રે કયાંથી આવ્યો...)
સસરા આવો વિચાર રે કયાંથી આવ્યો હો, જી રે!
તેણે મારાં મનડાંમાં હલચલ મચાવી રે,
આભારી હું તો બની!
કરમ સંજોગે બની હું તો વિધવા હો, જી રે!
તમે મારા ઉપર આવી દયા શીદ લાવી રે,
આભારી હું તો બની!
આજે તમે બન્યા છો ભગવાનથી મોટા હો, જી રે!
મેં તો તમારી મૂર્તિને દલડામાં સમાવી રે,
આભારી હું તો બની!
તમારી હિંમતને કોઈ નવ પહોંચ્યા હો, જી રે!
તમે આજે જગની જડ રસમને ભગાવી રે,
આભારી હું તો બની!
સસરા તમે બન્યા રે મારા પિતાજી હો, જી રે!
તમે આજે દુનિયાને દીધી છે શરમાવી રે,
આભારી હું તો બની!
આજે એક બાજુ રે હર્ષ નથી માતો હો, જી રે!
ને એક બાજુ પતિની યાદ જાય છે આવી રે,
આભારી હું તો બની!
પ્રેમથી રહેતી હતી તમારી સાથે હો, જી રે!
આજે એ પ્રેમની યાદે દીધી છે રડાવી રે,
આભારી હું તો બની!
વા'લાં સાસુ-સસરા રે, નણંદ-દિયર હો, જી રે!
આજે સૌને છોડવાની ઘડી ગઈ આવી રે,
આભારી હું તો બની!
* * *
ટિપ્પણીઓ નથી:
ટિપ્પણી પોસ્ટ કરો