(રાગ-ઘમ્મર ઘમ્મર મારું વલોણું ગાજે...)
ઢમઢમ ઢમઢમ આ ઢોલ વાગે,
શરણાઈ વાગે ને મારું મન ડોલે;
સામેથી સસરા મારા હસતા આવે,
‘દીકરી, દીકરી' કૈ મીઠા બોલ બોલે.
સાસુજી ઊભાં ઊભાં મુખ મલકાવે,
દીકરી વળાવવાની તૈયારી કરે;
દરજી બોલાવી કપડાં શીવડાવે,
ઘરેણાં લેવા જાય એ સોનીના ઘરે.
ઘરે ઘરે આમંત્રણ સસરા આપે,
દીકરીના વિવાહમાં સૌને તેડાવે;
ફૂલ્યા ન સમાય તેઓ અતિ આનંદે,
સગાં-સંબંધીને મીઠાઈ ખવડાવે.
આ નણંદલ મારાં ઠેકડા મારતાં,
ઉછળતાં ને કૂદતાં એ ગીતો ગાતાં;
‘ભાભી, ભાભી' કહેતાં મારી પાસે આવે,
મશ્કરી કરી તેઓ જાય મલકાતાં.
દેરીડાનો તો વળી મોટો તરખાટ,
લગ્નની તૈયારીમાં આગળ જ રહે;
ભાભલડીને જોઈએ તે લાવી આપું,
એમ હસતાં હસતાં એ મને કહે.
સાસુ-સસરા ને નણંદ-દિયર દ્વારા,
એક બાજુ વિવાહની તૈયારી થાય;
વાગે છે ઢોલ ને વાગે છે શરણાઈ,
બીજી બાજુ વિવાહનાં ગીત ગવાય.
* * *
ટિપ્પણીઓ નથી:
ટિપ્પણી પોસ્ટ કરો