(રાગ-ગામમાં પિયર ને ગામમાં સાસરું રે લોલ...)
સસરા તમારા દીકરા યુવાન છે રે લોલ,
લડાવ્યા છે ખૂબ તમે લાડ જો;
ઘરનો તે ભાર હવે એ ઉપાડશે રે લોલ!
તમારી મહેનત તમને ફળી છે રે લોલ,
માનજો તમે પ્રભુનો પાડ જો;
તમારો બોજ હળવો હવે કરશે રે લોલ!
કામ-કાજની ચિંતા તમે ત્યજી દેજો રે લોલ,
કામનો થશે ખૂબ ઉપાડ જો;
દીકરા તમારા છે ખૂબ મહેનતું રે લોલ!
મે'નત કરશું ને ફળ મેળવશું રે લોલ,
સુખનાં ઊઘડશે કમાડ જો;
દુઃખના દહાડા આપણા જતા રે'શે રે લોલ!
રામ-લક્ષ્મણ જેવા છે બંને દીકરા રે લોલ,
સમૃદ્ધિનાં ઉગાડશે ઝાડ જો;
કુટુંબની સમૃદ્ધિ તેઓ વધારશે રે લોલ!
તમે બનજો તેઓના માર્ગદર્શક રે લોલ,
ઠેકાડજો અંધારાની વાડ જો;
તમે આટલું તે કામ હવે કરજો રે લોલ!
દીકરા પછી બની જાશે હોશિયાર રે લોલ,
વહે જીવનની ઘટમાળ જો;
કામમાંથી તો લઈ લો પછી નિવૃત્તિ રે લોલ!
જીવનમાં સુવાસ તમે ફેલાવી છે રે લોલ,
યાદ થશે એની લાંબો કાળ જો;
તમારું આ જીવન સંદેશ બનશે રે લોલ!
* * *
ટિપ્પણીઓ નથી:
ટિપ્પણી પોસ્ટ કરો