(રાગ-એક વણઝારી ઝૂલણ ઝૂલતી'તી...)
એક લીલૂડું રમણીય જંગલ હતું,
એમાં જીવન જીવતાં સૌ મઘમઘતું;
એક લીલૂડું રમણીય જંગલ હતું.
તહીં સર્વે ફ્રૂલડાંની ફોરમ આવતી,
સૂરજમુખીનું ફૂલ રહે ચમકતું; એક લીલૂડું...
ઝાડ પવન સાથે ઝૂલા ઝૂલતાં હતાં,
ઝાડ નમસ્કાર કરતાં કેવું નમતું; એક લીલૂડું...
એક દિન આનંદમાં લહેરાતો હતો,
સૌનું મુખડું દેખાતું હતું મલકતું; એક લીલૂડું...
શુભ અવસર કોઈ ઉજવાતો હતો,
લગ્નગીત સંભળાતું'તું રણઝણતું; એક લીલૂડું...
સિંહરાજા મહેમાન તેમાં બન્યા હતા,
ઓલ્યું સસલું ચાલે છડી પોકારતું;એક લીલૂડું...
પે'લા વાંદરાભાઈ રસોયા બન્યા હતા,
ભોજન બનાવ્યું સૌને મનભાવતું; એક લીલૂડું...
સિંહણરાણી ગીતડાં તેમાં ગાતાં હતાં,
આતો હરણ-હરણીનું લગ્ન હતું; એક લીલૂડું...
સુખી થવાનાં દંપતીને આશિષ આપ્યાં,
જીવન સુખી હતું એનું મઘમઘતું; એક લીલૂડું...
બીજાં જંગલની હરણને માયા લાગી,
હરણ હરણીને છોડીને રહ્યું જતું; એક લીલૂડું...
હરણી કંથની વાટલડી જોવા લાગી,
એનું જીવન વિરહમાં જતું વીતતું; એક લીલૂડું...
* * *
ટિપ્પણીઓ નથી:
ટિપ્પણી પોસ્ટ કરો