(રાગ-કાંકરીના માર્યા કદી ન મરીએ...)
કરમમાં લખ્યાં કદી ન ટળતાં,
થવાનું જે હોય તે થાય, ગોરાંદે !
રીસ છોડીને હવે આવો રંગમાં!
વિદેશી માયામાં લોકો રંગાતા જી રે,
ધનવાન થવાને જાય, ગોરાંદે ! રીસ..........
તમારો વિરહ હવે ટળ્યો છે જી રે,
મનનો ભાર દૂર થાય, ગોરાંદે ! રીસ..........
તમારી માફી દિલથી માગું છું જી રે,
કેમેય રીસ ભાગી જાય, ગોરાંદે ! રીસ..........
ઘરનો ભાર હવે ઉપાડીશ જી રે,
તમથી સુખથી રે'વાય,ગોરાંદે ! રીસ..........
કોયલ મસ્તીમાં આવી નાચતી જી રે,
મધુર ગીતડાં એ ગાય, ગોરાંદે ! રીસ..........
મોરલિયો કળા કરી નાચતો જી રે,
કેવો સુંદર એ દેખાય, ગોરાંદે ! રીસ..........
રાસ રચીએ ચાંદની રાતમાં જી રે,
આનંદ અનેરો લે'રાય, ગોરાંદે ! રીસ..........
રમવા બોલાવે રૂડી ચાંદની જી રે,
ઘરમાં તો કેમ બેસાય, ગોરાંદે ! રીસ..........
વે'લો ન આવ્યો એનો અફસોસ જી રે,
હવે આમ રીસાવાય, ગોરાંદે ! રીસ..........
વિદેશને દીધી છે તિલાંજલિ જી રે,
હવે નહિ કદી જવાય, ગોરાંદે ! રીસ..........
આવો ન રંગમાં તો મુજ સમ છે જી રે,
આટલું મોંઘું ન થવાય, ગોરાંદે ! રીસ..........
* * *
ટિપ્પણીઓ નથી:
ટિપ્પણી પોસ્ટ કરો