(રાગ-કા'નુડાને કે'જો એકવાર ગોકુળિયામાં...)
પિયુજીને કહેજો હવે વિદેશમાંથી આવે,
વિદેશમાંથી આવે અને દેશપ્રેમ જગાવે;
પિયુજીને કહેજો હવે વિદેશમાંથી આવે!
પ્રેમના રે તરસ્યાં અમે, ગળે શોષ પડતા,
વિદેશમાંથી આવી અહીં પ્રેમ તો વરસાવે; પિયુજીને...
ભાવના રે ભૂખિયાં અમે ખૂબ ખૂબ દુઃખિયા,
વિદેશને છોડીને અહીં પ્રેમગંગ વહાવે; પિયુજીને...
નાનાં અમથી ઘરનો ભાર કેમ સહેવાય?
વિદેશમાંથી આવે ને બોજો હલકો કરાવે; પિયુજીને...
નાનેરો બાળ નિરંતર ‘પિતા, પિતા' ઝંખતો,
વિદેશમાંથી આવે અને બેટા કહી બોલાવે; પિયુજીને...
સુધબુધ રહે નૈ અમે ભાન ભૂલી જઈએ,
પિયુજી આવીને હવે અમને ભાનમાં લાવે; પિયુજીને...
ધનના રે મોહમાં આપણો દેશ તમે છોડયો,
વિદેશનું કામણ હવે ખૂબ દૂર ભગાવે; પિયુજીને...
આપનારો અહીં પણ હજાર હાથવાળો છે,
ટુકડો આપે પણ એ ભૂખ્યા ન સુવડાવે; પિયુજીને...
તમારા વિના તો અહીં છે ફૂલ કરમાયેલાં,
તમે આવો તો હવે ઋતુરાજ વસંત આવે; પિયુજીને...
તમારી યાદમાં અમારે બારેમાસ ચોમાસું,
નથી ઘરધણી હાજર પછી કોણ મનાવે; પિયુજીને...
સમયચક્ર ફરે દિવસ વીતતા જાય છે,
લાંબો લાંબો વિરહ હવે કેટલોક સહાવે; પિયુજીને...
* * *
ટિપ્પણીઓ નથી:
ટિપ્પણી પોસ્ટ કરો