(રાગ-સત્સંગમાંથી રજા લઈને...)
કરમ સંજોગે વિધવા બની,
તૂટી પડયું છે આભ એના પર,
હિમ્મતના બે શબ્દ કે'જો,
જઈને સૌ દિલાસો દેજો. (ર)
સુખનાં જે વાદળાં હતાં
એ વાદળો વિખરાઈ ગયાં,
વસંતની ખીલી'તી મોસમ
ત્યાં પાનખર પથરાઈ ગયા;
ઉજ્જડ વનમાં ભટકતી
એના સંગાથે કદી' રે'જો, જઈને સૌ.....
સંસારમાં હજુ પગ માંડયો'તો
એ પગ એનો લપસી ગયો,
કનૈયા જેવો જેનો પતિ હતો
એ પતિને કાળ ભરખી ગયો;
એ કરૂણ કલ્પાંત કરતી
એના દુઃખને તો ઘ્યાને લેજો, જઈને સૌ.....
ચંદ્ર આજે ઝાંખો થયો
ને સૂર્યનું તેજ હણાઈ ગયું,
ખીલ્યું'તું ફૂલ બાગમાં
એ અચાનક કરમાઈ ગયું;
વિધવા બની એ દુઃખી થઈ
એને હિમ્મત દેતા રે'જો, જઈને સૌ.....
* * *
ટિપ્પણીઓ નથી:
ટિપ્પણી પોસ્ટ કરો