(રાગ-હા, હા રે! ગોકુળની ગોવાલણી રે...)
હા, હા રે! નાનેરા દેરીડા રે જલ્દી તું બન મહાન,
એ... તારી યુવાનીનું સંભળાય ગાન રે,
નાનેરા દેરીડા રે જલ્દી તું બન મહાન!
તારી મે'નતને હેતથી વધાવશું દેરીડા!
તારો અનુભવ અમે અપનાવશું દેરીડા!
એ... તારી મહાનતાનાં ગાશું અમે ગાન રે, નાનેરા...
અમને ન કદીએ ભૂલી જાતો રે દેરીડા!
તોડજે ન આપણો રૂડો નાતો રે દેરીડા!
એ... તું ઘરનો છે કામણગારો કા'ન રે, નાનેરા...
નાનપણનાં નખરાં તું છોડી દે દેરીડા!
ગંભીરતા તરફ મુખ મોડી દે દેરીડા!
એ... હવે તો બની જાજે તું ધૈર્યવાન રે, નાનેરા...
માબાપની આજ્ઞાનું પાલન કરજે દેરીડા!
આ ભાભલડીની વાત ઘ્યાને ધરજે દેરીડા!
એ... જીવનમાં બનજે તું નિષ્ઠાવાન રે, નાનેરા...
માત-પિતાનાં હેત તને મળ્યાં રે દેરીડા!
સૌના આશીર્વાદ જાણજે ફળ્યાં રે દેરીડા!
એ... ઘરમાં આવશે રૂડી મુસ્કાન રે, નાનેરા...
મારી રૂપાળી દેરાણી શોધશું રે દેરીડા!
જાણે પરીઓની રાણી શોધશું રેદેરીડા!
એ... તેડાવશું અમે રૂડા મહેમાન રે, નાનેરા...
અમે આનંદથી તને પરણાવશું રે દેરીડા!
આપણા ગામને ગીતોથી ગુંજાવશું રે દેરીડા!
એ... તારી જોડશું જાડેરી અમે જાન રે, નાનેરા...
* * *
ટિપ્પણીઓ નથી:
ટિપ્પણી પોસ્ટ કરો