(રાગ-આભમાં ઝીણી ઝબૂકે વીજળી રે...)
સ્વામી ! આપણા ઘરમાં છે નાનો બાળ રે,
હજુ તો છે ચોઘડિયું કાળ રે;
સ્વામી ! નહિ જવા દઉં વિદેશમાં રે!
ગોરાંદે ! મારે ધન કમાવવા જાવું છે રે,
પાછો આવી જઈશ તત્કાળ રે;
ગોરાંદે ! મારે જવું છે વિદેશમાં રે!
સ્વામી ! સૂરજ નથી સમજણો થયો રે,
એને નથી આવ્યું ભાન રે;
સ્વામી ! નહિ જવા દઉં વિદેશમાં રે!
સૂરજ તો કાલે મોટો થઈ જશે રે,
ઘરે નહિ થવાય મહાન રે;
ગોરાંદે ! મારે જવું છે વિદેશમાં રે!
સ્વામી ! આપણાં માતા થયા છે વૃદ્ધ રે,
ને પિતાજી રહે છે બિમાર રે;
સ્વામી ! નહિ જવા દઉં વિદેશમાં રે!
પિતાને સાચવશે નાનાં ભાઈ-બહેન રે,
માતાનો ઉપાડજે તું ભાર રે;
ગોરાંદે ! મારે જવું છે વિદેશમાં રે!
ઘરનો બોજ મારાથી કેમ ઉપડે રે,
નારી કહેવાય છે અબળા રે;
સ્વામી ! નહિ જવા દઉં વિદેશમાં રે!
નારી તો શકિત થઈને પૂજાણી છે રે,
અબળા મટી થઈ સબળા રે;
ગોરાંદે ! મારે જવું છે વિદેશમાં રે!
કાળની ગતિ બની કેવી ન્યારી રે,
કેમ સહેવો વિરહ રે;
સ્વામી ! નહિ જવા દઉં વિદેશમાં રે!
ગોરાંદે ! હિમ્મત ન તું હારી જા રે,
જલદી બદલી જશે ગ્રહ રે;
ગોરાંદે ! મારે જવું છે વિદેશમાં રે!
અમને જરૂર છે તમ સંગની રે,
તમે પકડો છો વિદેશી રાહ રે;
સ્વામી ! નહિ જવા દઉં વિદેશમાં રે!
મુજને પણ ઘરની માયાઘણી છે રે,
બેઠા બેઠા કેમ ચાલે નિર્વાહ રે;
ગોરાંદે ! મારે જવું છે વિદેશમાં રે!
વિધાતાએ લેખ કેવા લખ્યા છે રે,
કે આમ થાવું પડે અલગ રે;
સ્વામી ! નહિ જવા દઉં વિદેશમાં રે!
વિધાતાને દોષિત ન કરાય રે,
કર્મમાં ન હોય લાગવગ રે;
ગોરાંદે ! મારે જવું છે વિદેશમાં રે!
સૂરજ સમજણો જયારે થશે રે,
પૂછશે કયાં છે મારો બાપ રે;
સ્વામી ! નહિ જવા દઉં વિદેશમાં રે!
સૂરજને જવાબ આપજે હોંશથી રે,
કમાવા ગયો તુજ તાત રે;
ગોરાંદે ! મારે જવું છે વિદેશમાં રે!
* * *
ટિપ્પણીઓ નથી:
ટિપ્પણી પોસ્ટ કરો