(રાગ-મણિયારો તે હાલું હાલું થઈ રહ્યો..)
પિયુજી પરદેશમાં હાલ્યા
ને મારાં મનડાં માને નહિ રે;
સયર મારી ! સૂરજ છે નાનો બાળ,
સખી મારી ! સૂરજ છે નાનો બાળ!
પિયુજી પરદેશના ચાહક
ને હું તો ભાન ભૂલી ગઈ રે;
સયર મારી ! આ દુઃખ કેમ સહું,
સખી મારી ! આ દુઃખ કેમ સહું!
પિયુજીને કમાવવું છે ધન
ને મારે જોઈએ એનો સાથ રે;
સયર મારી ! વિયોગ વસમો લાગશે,
સખી મારી ! વિયોગ વસમો લાગશે!
પિયુજી બની ગયા પરોણિયા
મને રાખી સૂરજ સંગાથ રે;
સયર મારી ! ઘરનો ભાર મને સોંપ્યો,
સખી મારી ! ઘરનો ભાર મને સોંપ્યો!
પિયુજી વગાડતા વાંસળી
ને ભૂલી જતી હું ભાન રે;
સયર મારી ! આ દુઃખ કેમ સહું,
સખી મારી ! આ દુઃખ કેમ સહું!
પિયુજી કરતા વાતલડી
ને હું સુણતી દઈ કાન રે;
સયર મારી ! વિયોગ વસમો લાગશે,
સખી મારી ! વિયોગ વસમો લાગશે!
પિયુજી મન કઠણ કરે
ને મારું મન રડી પડે રે;
સયર મારી ! વેદના વધતી જાય છે,
સખી મારી ! વેદના વધતી જાય છે!
પિયુજીને પરદેશે મોભ
ને ઘરેથી નીકળી પડે રે;
સયર મારી ! પરદેશનો મોહ કેમ જાગ્યો?
સખી મારી ! પરદેશનો મોહ કેમ જાગ્યો?
પરદેશ સમૃદ્ધ કેમ થયો
ને થયો ન આપણો દેશ રે;
સયર મારી ! દેશને દીનતા ઘેરી વળી,
સખી મારી ! દેશને દીનતા ઘેરી વળી!
દીનતાએ અનેક ખોઈ દીધા
ને ગયા તેઓ વિદેશ રે;
સયર મારી ! વિદેશનો રંગ સૌને લાગ્યો,
સખી મારી ! વિદેશનો રંગ સૌને લાગ્યો!
ધન કમાઈ કયારે આવે
ને કયારે મિલન થાય રે;
સયર મારી ! વાટડી જોવાનો વખત આવ્યો,
સખી મારી ! વાટડી જોવાનો વખત આવ્યો!
વિદાય દેતાં મન ભાંગી પડે
ને આંખ ભીંજાય જાય રે;
સયરમારી ! જલદી પાછા આવી જાય,
સખી મારી ! જલદી પાછા આવી જાય!
* * *
ટિપ્પણીઓ નથી:
ટિપ્પણી પોસ્ટ કરો