(રાગ-સહિયર મોરી ચાંદો યગ્યો ચોક જો...)
સહિયર મોરી આનંદ આજ અનેરો જો,
પિયુજી વિદેશમાંથી આવ્યા રે લોલ!
સહિયર મોરી હવે સુધરશે ફેરો જો,
પિયુજી વિદેશમાંથી આવ્યા રે લોલ!
સહિયર મોરી દીવડિયા પ્રગટાવું જો,
આરતી એની હું તો ઉતારું રે લોલ!
ગલીએ ગલીએ સાથિયા પૂરાવું જો,
ઘર સજાવી દઉં અમારું રે લોલ!
સહિયર મોરી આ દુઃખનો આવ્યો અંત જો,
આવી ગ્યા ‘એલી, એલી' કે'નારા રેલોલ!
ખવડાવું એને શીરો, પૂરી ને સેવ જો,
આવ્યા મુજ રસોઈ ખાનારા રે લોલ!
સહિયર મોરી ગવડાવું હું તો રાસ જો,
સરખી સહેલીઓના સંગે રે લોલ!
આનંદતણી વાત કેમ વર્ણવું જો,
રોમેરોમ નાચે છે ઉમંગે રે લોલ!
સહિયર મોરી મોરલિયા ટહુકિયા જો,
કોયલ છેડે છે સરગમ રે લોલ!
વાદળાઓએ તોડયું પોતાનું મૌન જો,
ઢોલ વગાડે છે ઢમઢમ રે લોલ!
(શાંત સ્વરે...)
સહિયર મોરી દુઃખ હૈયે એક રહ્યું જો,
મિલન ન થયું પુત્ર સાથે રે લોલ!
તૂટી પડયો છે મારા ઉપર આ પહાડ જો,
ભાર રહ્યો છે એટલો માથે રે લોલ!
* * *
ટિપ્પણીઓ નથી:
ટિપ્પણી પોસ્ટ કરો